Trüchblick up uns´n Grillnahmeddag an´n 27.Juni 2019

Ditmal harr´n wi wedder schönet Wärer. Na de grot Hitt wier dat , twors ´n bäten käuhl un de Wind fägte de Gegenstänn´ von de Dische. Väle Maaten mit ehre Partner un Frünn´ sünd kamen un makten sick dat up´t Flach twüschen de Böm in´n Botanschen Gorden kommodig. Wi harr´n je ok all´s gaut vörbereit´t un inköfft. Dat geef wat tau Drinken, mit un ahn Alkohol. Tau´n Äten wier Bratwust un Grillfleesch dor un unse Maatin Heidrun Rother hett ´nen lecker Tüftensalat makt, von den´n nix oewerbläben is. Gerhard Goldammer un Bernd Andres hemm´  de Wust un dat Fleesch grillt un dat hett  sihr gaut smeckt. De Frünn´ von´n Botanschen Gorden hemm´ düchtig bi de Vörbereitungen hulpen. Ok Jürgen Riechert un Bernd Andres wieren dorbi, as de  Dische un Stäuhle upstellt würden.

Ein hartlichet Dankeschön mit Urkunn´ ´nen schönen Blaumenstruß un ´ne lütt Upwands-entschädigung bekeem  Werner Brinckmann von unsen Vörsitter Jürgen Wittmüß för de akkerate Vörbereitung un Dörchführung von´n de Plattdütsch-Bäukerdage in´n Botanschen   Gorden. Dat geef düchdig Bifall.

Dat wier ´ne lustig Gesellschaft. Dor ward orrig mit de Frünn´ snackt un lacht un sick oewer Olldagsgeschichten ünnerholl´n.

Ein tollet Ünnerhollungsprogramm makten nu unse Plattsnacker Jürgen, Anke un Hans-Jürgen. Dortwüschen meld´te sick de Prof. Wolfgang Methling un hett ´ne Oewerraschung för unsen Präsident Uwe Süssmilch hatt. Hei  wür´  mit  ´ne  Ihrenurkunn´ von´n Heimatverband för sien langöhriget Engage-ment för den Erholl un de Pläg von de nedderdütsche Sprak utteiknet. Uwe künn´t dat gor nich faten. Hei hett sick sihr doroewer freut. Wi hemm´ em all hartlich grateliert.  Mit väl Hoeg güng uns Grillnahmeddag tau Enn´.

Wi bedanken uns noch eis bi all de Maaten un Frünn´ de dorbi hulpen hemm´, disse schöne Veranstaltung tau organisieren un dörchtauführen.

Text: Eva Dittberner

Fotos: Hartmut Christoph