Wi grillen in´n Botanschen Gorden

Ok in´n Harwstmaand harr´n wi noch schönet Wärer. De Corona-Pandemie hett unse ganze Planung för dit Johr düchdig dörcheinanner bröcht. Väle Veranstaltungen sünd in´t Water foll´n. Ok unse Busfohrt künnten wi nich maken. Aewer unsen Grillnahmeddag in´n Botanschen Gorden, den hemm´ wi uns nich nähmen laten. Unse Vereinsmaaten un Partner sünd tahlriek kamen un freuten sick up ein Wedderseihn.  Sei makten sick dat up´t Flach twüschen de Böm in´n Botanschen Gorden kommodig.

As ümmer  harr´n wi ok all´s gaut vörbereit´t un inköfft. Dat geef wat tau Drinken un grilltet Fleesch un Wust tau´n Äten. De Stimmung wier sihr gaut. Unse Maatin Heidrun Rother hett  ditmal ok wedder ´nen leckern Tüffelsalat makt, de gaut ankamen is. Ein gaudet Grillteam wieren Maike Krüger, Thomas C.v. Widdern un Bernd Andres. De hemm´ ehre Sak sihr gaut makt. Dorför ein hartlichet Dankeschön.

Wi harr´n ok Besäuk von´n TV Rostock, de ´nen "sihr" korten Film oewer den Verein dreihten. Uwe Süssmilch un Jürgen Wittmüß sünd tau Wurt kamen. Uns Präsident Uwe Süssmilch wier an´n 17. März 85 Johr olt worr´n un an dissen Dag sallte hei ´ne Utteiknung kriegen. „Corona” hett dat verhinnert un wi halten dat up den Grillnahmeddag nah. Uwe kreeg den Ille Frentz Pries un dormit  wier ok ein Obolus verbunn´n. Hei hett vör 25 Johren den Verein gründ´t un wier bet hüt ümmer för den Verein dor. Den Pries mit Urkunn´ hett Werner Brinckmann anrägt un de Idee wier von unsen Vörsitter un de Vörstandsmaaten giern upnahmen wor´n. Wi gratelierten hartlich un hoffen, dat Uwe noch lang för uns dor sien kann.

Ein dullet Ünnerhollungsprogramm makten nu unse Plattsnacker Jürgen, Anke un Hans-Jürgen. Dat wier wedder ganz fidel un geef väl Bifall. Karin Möller sammelte Spenn´ för de Kinnerkräwtstation un dor keem ok orrig wat tausamen. Wi bedanken uns noch eis bi all de Maaten un Frünn´ de dorbi hulpen hemm´, disse schöne Veranstaltung tau organisieren un dörchtauführen.

Text: Eva Dittberner

Fotos: Hartmut Christoph