Uns´ Grillnahmeddag in´n Botanischen Gorden an´n 24.06.2021

Na de Corona-Inschränkungen wier dat dat ierste Tausamensien mit unse Vereinsmaaten un Vereinsmaatinnen. All hemm´ sick orrig freut, mal wedder ünner sick tau sien un plattdütsch tau snacken, singen un tau fieern. De Nahmeddag wier sihr schön. Dat Wärer hett mitspält un all hemm´ gaude Lun mitbröcht. Uns Vörsitter hett alle Maaten un Plattdütschfrünn hartlich begrüßt. De Börgerschaftspräsidentin, Regine Lück, hett uns Inladung annahmen un is as  Ihrengast begrüßt word´n. Sei hett uns verspraken, sick för den Erholl von de  plattdütsche Sprak intausetten. Ick glöw, sei hett sick bi uns wollfäuhlt.

Ein schönet plattdütschet Programm mit Musik un Vördräg hett dat gäben. Besonners hett H.-J. Schulze dorför sorgt. Mit von de Partie wieren Christine Stübe, Wilhelm Münchow, Karin Tanz un Jürgen Wittmüß. Hartlichen Dank dorför.                                                                              Hartlich müchten wi uns bedanken bi all de Maaten, de uns bi de Vörbereidung un Dörchführung von unsen Grillnahmeddag hulpen hemm´. Dor wier orrig inköft wor´n, de Grillmeisters stünn´ an´n Grill un makten ehre Sak gaut. Bi´t Utgäben von Fleisch, Wurst un Salat würd hulpen un ok lecker Salat makt.                                                                                                                                                                                                         För Äten un Drinken sorgten unse Sponsoren, de Wurst, Fleisch, Bier un Säfte sponserten. Dat wieren "die Rostocker Klasse Wurst", de Brugerie "Rostocker" un "Sonnländer". Wi bedanken uns hartlich.

Väl würd klönt, dor wi uns lang nich seih´n har´n. Dat hett all´n Spaß makt. De Nahmeddag güng väl tau fix vörbi un wi hoffen, dat uns Verein noch ofteis so schöne Veranstaltungen dörchführ´n kann.

Fotos

von Eva Dittberner, Hermann Peters, Hartmut Christoph

Grillnahmeddag för unse Vereinsmaaten un Partner.