Dat wier wedder mal schön

Einen wunnerschönen Grillnahmed-dag hemm´ wi in´n Botanischen Gorden mit unse Vereinsmaatinnen un Vereinsmaaten biläwt. Dat Wärer wier passig för uns makt. Nich tau kolt un nich tau warm. All freuten sick, mal wedder in disse schöne Runn´ tausamen tau sien. Dor ward orrig Fleesch un Wust schnabuliert, ´n bäten wat drunken un klönt. Uns Vörsitter hett all de Maaten fründlich begrüßt un Fru Gerlinde John as niege Vereinsmaatin vörstellt. Sei is de Dochter von Gretel Kluttig, de uns leider väl tau tiedig verlaten hett. Intwüschen röpen de beiden Grillmeisters, Bernd Andres un Jürgen Riechert, dat dat Äten farig is. Sei hemm´ dat sihr schön makt un twüschendörch hemm´ ok Jens Anders un Sigi hulpen. `Nen gauden Nudelsalat hett Heidrun Rother farig makt, de allen gaut schmeckt hett.

Ok de Kultur is nich tau kort kamen. Wilhelm Münchow un Karin Döring vertellten Geschichten un Riemels un unse Plattsnacker, Jürgen, Anke un Hans-Jürgen makten ein dullet Programm. Dat hett all´n Spaß makt. Dorbi probierten sei glieks dat niege Lutspräkergerät ut, dat uns Vereinsfründ, Hartmut Christoph, sponsert hett. Dat fungsche-neerte gaut. Ok uns Präsident, Uwe Süssmilch un siene Fru Heidi hemm´ sick dat nich nähmen laten, bi disse Veranstaltung dorbi tau sien un düchdig mittaufieern. Wi hemm´ ok wedder an de kräwtkranken Kinner dacht un Siggi is ok glieks mit de Sammelbüss´ rümgahn. All hemm´ disse gaude Saak ünnerstütt´t un wat in de Büss rinleggt.  Man süht, wie sick Siggi  oewer dat Ergäwnis freut. An dissen Nahmeddag sünd 353,00 € tausamenkamen. In de Spenn´box wieren noch 40,00€ von Hans-Jürgen Schulze und 80,00 €, de Uwe Süssmilch insammelt hett. Tausamen wieren dat 473,00€. Hartlichen Dank dorför.

Text: Eva Dittberner

Leiw´ Vereinsmaaten,

an disse Stell mücht ick mi bi all bedanken, dat uns Grillnahmeddag so schön wor´n is. Besonners mücht ick mi aewer bi de Maatinnen un Maaten bedanken, de sick üm de ganze Vörbereitung un Dörchführung kümmert hemm´. Dorbi mücht ick beginn´ mit de Grillmeisters Bernd, Jens un Jürgen Richert, wierer mit de, de dat allens inköfft un mitbröcht hemm, uns Eva un Bernd un an de, de dat  alls up- un afbugt hemm´. An all de Klönsnacker, de lütt bäten för Ünnerhollung sorgten. An uns Siggi, de öwerall anraupen hett, dormit dat mit Fleesch, Wust un Bier klor geiht.Tau gauder Letzt aewer groten Dank an de Mitarbeiter von’n Botanischen Gorden, de de Vörrutsettungen schafft hemm´, dat wi dor uns´n Vereinsgrillnahmeddag dörchführ‘n künnten.

Juch Vörsitter

Fotos: Hartmut Christoph