Grillnahmeddag in Toitenwinkel

Ditmal makten wi unsen Grillnahmedag in Toitenwinkel, in de „Olle Schmä“. Uns Vörsitter hett dat gaut organisiert, Grillmeisters besorgt, Dische un Stäuhle upstellt un för ´ne Oewerdachung sorgt. Sigi hett düchdig inköfft un ok dat Fleesch un Bier bi de Sponsoren bestellt. Wi sünd bi wunnerboret Wärer ankamen, oewer denn hett uns doch ein Rägenguss oewerrascht. All´ns güng vörbi un wi hemm´ uns de Stimmung nich vermiesen laten. De Grillmeisters wieren grotorrig un hemm´ düchdig schweit´t bi´t Grillen. Heidrun Rother wier ok flietig un hett för all Maaten ´nen gauden Nudelsalat makt. Dorför hartlichen Dank.

Uns Vörsitter begrüßte de Maaten un Gäst un vertellte ein bäten oewer de „Olle Schmä“. Sekt, Bier un annere Getränke güngen tahlriek oewer den Disch un de Runn´ wür ümmer fideler. Nu wieren Hermann, H.-Jürgen un Jens in ehr Element. Sei makten zünftig Musik un hemm´ de Maaten gaut ünnerholl´n. Schöne Leeder geef dat tau Gehür un all süngen mit. De drei Muskanten harmonierten gaut miteinanner. Nu wier de Stimmung besonners gaut un wi wullten ümmer wedder ´ne Taugaw´.

All hemm´ gaut äten un drunken un keinein hett Lust hat, na Hus tau gah´n. Wi bedanken uns hartlich bi all de Maaten un Frünn´, de dissen Grillnahmedag so gaut organisiert hemm´.

Unse Sigi sammelte wedder Spenn´ för de Kinnerkräftstation. Dat is ´ne gaude Tradition bi uns. An dissen Nahmeddag sünd 387,55 Euro tausamenkamen. Dat is fast ´ne Sensation. Uwe Süssmilch hett vörher ok all 260,00 Euro insammelt und dat geiht wierer. Hartlichen Dank!!!

Text: Eva Dittberner

Fotos: Hartmut Christoph

Ditmal is uns Grillnahmeddag in de "Alte Schmiede" in Toitenwinkel.