Grillnachmittag vom Plattdütsch-Verein

Botanischer Garten, Hamburger Str. 28 18069 Rostock

Uns Grillnahmeddag is ümmer ein Höhepunkt vör de Sommerpaus un wi hemm´ uns lang dorup freut. Is dat je ok ´ne Gelägenheit, wedder eis in den Botan-schen Gorden tau gahn. So as dat letzt Johr hett uns Petrus ´nen Strich dörch de Räknung makt. Buten in de schöne Natur tau Grillen wier uns nich vergünnt. Dat hett dull pladdert. Aewer de Frünn´ von´n Bot. Gorden hemm´ spurt un uns dat grote Plantenhus tau Verfügung stellt. Wi seeten dorin komodig un dröch. Ein poor Vereinsmaaten un Gäst sünd nich kamen, de hemm´ sick vör dat Wärer schucht. Dat wier liekers ´ne gaude Veranstaltung.

Uns Gerhard Goldammer hett de Wust un dat Fleesch wedder grillt un dat hett hei gaut makt. Gaude Ünnerhollung hett  "Helmut ut Rostock" makt. Mit Musik, Gesang, plattdütsche Riemels un väl Witz hett hei uns dörch den Nahmeddag bröcht. Sogor danzt hemm´ wi. Von unse Vereinsmaaten keemen ok noch ein poor Bidräg.

Wi müchten uns bi all´ de Vereinsmaaten un Frünn´ von´n Botanischen Gorden bedanken, de tau dissen schönen Nahmeddag bidragen hemm´. Besonners bi Prof. Dr. Stefan Porembski un Fru Anne Wollert (niege Techn. Leiterin) bedanken wi uns hartlich, dat wi wedder unse Fieer in´n Bot. Gorden dörchführ´n dörften un so gaude Ünnerstüttung hatt hemm´.

Uns Vörsitter, Jürgen Wittmüß hett siene Begrüßungsansprak gliek nutzt, üm sick bi unsen Vereinsmaaten Werner Brinckmann för sienen groten Insatz bi de Vörbereitung un Dörchführung von den 4. Plattdütsch-Bäukerdag tau bedanken.

Tau´n Afschluß von unsen schönen Grillnahmeddag ward as ümmer uns heimlich Nationalhymne sungen "Wo de Ostseewellen trecken an den Strand". All hemm´ mitsungen un sünd denn taufräden na Hus gahn.

Fotos: Hartmut Christoph, Hermann Peters, Holger Ahrens

Grillen mit de Maaten von´n Plattdütsch-Verein un siene Sponsoren.

 

Zurück