Grillnahmeddag

Watt harr´n wi doch för Glück hatt! Dat Wärer hett mitspält, dat wier warm un drög. Uns´n Grillnahmeddag künnten wi nu endlich orrig dörchführ´n. Unse Vereinsmaatinnen un Vereinsmaaten sünd tahl-riek kamen un hemm´ sick oewer dat schöne Flach in den´n Botanischen Gorden freut. Flietige Lüüd von´n Verein hemm´ alls gaut vörbereit´t, inköfft un in den Gorden bröcht. Eine grote Oewerraschung wier, dat de TV Rostock mit twei Lüüd keem un unse Veranstaltung in´t Fiernseih´n oewerdragen hett. Uns utborgter Grillmeister, Uwe, makte ganze Arbeit. Trotz grote Hitt hett hei dörchholl´n un alle Maaten gaut versorgt. Fleesch un Wust wier gaut dörch un all wieren taufräden.

Uns nieger Vörsitter, Jens Anders un Hans-Jürgen Schulze makten ein lütt Programm mit väl Musik. Sei hemm´ dormit all Gäst orrig Freu makt. Dat wier ´ne fidele Gesellschaft, de ok düchtig mitsungen hett. Na de lang Sommerpaus wier dat Tiet, dat wi uns all wedderseih´n künnten´. Dat geef ok sihr väl tau Klönen. Wat tau Drinken wier rieklich dor, keinein müsst dösten, dat hett natürlich de Tungen löst. Einen gauden Nudelsalat hett, as jedet Johr, uns Vereinsmaatin Heidrun Rother för uns farig makt. Sihr gaut hett hei smeckt.

Hartlichen Dank dorför.

 Man süht, dat Sigi entschlaten mit de Sammelkist in de Runn´ geiht, üm för de Kinnerkräfthülp Geld intausammeln. Dat maken wi jedet Johr bi unsen Grillnahmeddag. Eva un Sigi hemm´ denn dat Geld tellt. Tausamenkamen sünd 275,00 Euro. Wi freuen uns, de Spenn´ an´n 09.12.2023 up den´n Wihnachtsmarkt bi dat Vereinshus, Dr.-Lorenz-Weg 5, 18059 Rostock, an Fru Prof. Dr. Gudrun Eggers tau oewergäben.

De Wihnachtsmarkt is af Klock teihn bet Klock fief apen. Dor gifft dat väl ut de Region tau köpen. Tau´n Bispill: Frisch schlachtet Häuhner un Anten as Wihnachtsbraden, Wust, Schinken, Brot, Kauken, Honnig un Handarbeiten. För dat leiwlich Woll ward ok sorgt mit Bradwust von´n Grill un Gläuhwien. Kamt man dor hen, dat lohnt sick!

Dat wier ein schöner Nahmeddag. Hartlichen Dank an alle, de för de gaude Veranstaltung sorgt hemm´. Ein Dankeschön geiht ok an de Lüüd von´n Botanischen Gorden.

Text: Eva Dittberner

Fotos: Eva Dittberner und Hartmut Christoph