Führung dörch dat Polarium in´n Zoo

Dat wier viellicht ein schöner Nahmeddag, den de Rostocker Zoo för uns´n Plattdütsch-Verein makt hett. Tahlriek hemm´ sick unse Maatinnen un Maaten pünktlich Klock twei an´n Zooingang drapen. Sigrid Malewschik hett all´s orrig organisiert un ok gliek von jedein fief Euro för de Führung afknöpt. In twei Gruppen güng dat nu los. De twei Frugens, de uns all´s wiesten , vertellten ok oewer de Entstahung von den Zoo. Vör 120 Johren wier dat na un na ein Zoo worden. Dorvör wier dat sowat as ein botanschen Gorden mit väle interessante Böm un Planten ut dat In- un Utlann´.

Denn bröchten de iersten Lüüd Swien dorhen un de Seefohrers harr´n von ehre Reisen exotische Dierte mitbröcht. Hüt is de Rostocker Zoo de beste Zoo von Europa. In´n Zoo läben 4.200 Dierte ut aller Welt, ümgäben von´ne historisch Parkanlag. ´Ne grote Errungen-schaft wier dat Darwineum mit siene Tropenhall´ un de Evolutionsutstellung.  Nu sünd ok de Läbensbedingungen för väle Dierte dörch dat Polarium verbädert wor´n.

Dor sünd nu de Iesbären un de Pinguine tau Hus. Dat Gelänne ümfött ´ne Gesamtfläch von ca. 12.500qm.                                         

Up de Biller is tau seih´n, dat sick hier de Humboldt-Pinguine  wollfäuhlen. Väl Warer, Utlop un Felsen tau´n Verstäken un tau´n Bräuden. Dörch de Sichtschiewen kann man de Dierte ok ünner Warer swimmen seih´n.

De König von de Arktis, as de Iesbär ok nömt ward, hett in´n Polarium ´ne gaude Heimstätt funnen. Sei finn´n hier ok all´s vör, wat sei bruken un de Zoobesäuker könn´ de Dierte gaut beobachten. Sei bewägen sick ünner Warer so fix un so geschickt, dat dat väl Spaß makt , sei antaukieken.           De Iesbären hemm´ ok ´ne gaude Anlag krägen.

Unse Grupp hett Fru Teréz Seibt dörch dat Polarium führt. Sei hett väl oewer de Anlag un de Dierte vertellt un all hemm´ nipping tauhürt. Dat güng ok üm ein poor statsche Böm, de man dörch de Bugerie nich kaputt maken dörfte. Uns Vereinsmaat Peter Hagedorn wüßt ok dorvon tau vertell´n. Hei hett früher an de Anlagen von´n Zoo mitbugt. Nu güng dat noch in de Afdeilung Meeres-welten. Dor geef dat orrig bunte Fische un kuriose Meeres-dierte ut de Welt von de Ozeane tau seih´n. Dat wier as in´n Märchen. Wi hemm´ Muränen, ´ne Krak, ´nen Hornhai un väle Quallenoorten ankieken könnt.

Uns Vörsitter hett Fru Seibt unse Dokumente för de Oewernahm von  ´ne Patenschaft för dat Polarium oewergäben. Fru Seibt bedankte sick in´n Namen von´n Zoo. Dorför kriegten wi de Urkunn´, ünnerschräben von´n Zoodirekter Uwe Nagel, oewerreikt. Wi bedankten uns hartlich bi de beiden Frugens för de interessante Führung un makten uns denn up den Heimweg.

Text: Eva Dittberner

Fotos: Hermann Peters, Hartmut Christoph, Holger Ahrens, Eva Dittberner