WIR LIEBEN COOKIES
Fasching mit de Klönsnacker
"Kurt-Dunkelmann-Stuw" (Neptuntreff der BG Neptun), Helsinkier Str. 38 18107 Rostock
De 18. Hornung wier ein herrlich Sünnendag. So orrig tau´n Spazierengahn. Liekers hemm´ sick de Plattdütschfrünn in de Kurt-Dunkelmann-Stuw´ infunn´. Leider wieren nich all de Stammgäst dor, de harr´n je ok mal wat Anneret vör.
Hartmut Christoph harr siene Treckfiedel dorbi. Schon bi dat Intreffen von de Gäst ward Musik makt un all glieks in Stimmung bröcht. Dor nu in´n Februormaand de Faschingstiet is, kemen de Lüd mit lustig Kostüme orrer ´nen schicken Haut. Dat sallt je ok so sien. Sigrid hett Gläuhwien ansett un up de Dische stünn´ Kauken. Dat wier ´ne kommodige Gesellschaft!
Mit von de Partie wieren de Plattsnacker Uwe, Jürgen, Karin, Sigrid, Eva, Hartmut, Wilhelm, Holger un wiedere Gäst. Dorit Schröder drög dat Riemel von de Loreley in plattdütsch vör. Dat hett Paul Knöchel oewersett. Sei makte dat so orrig, dat sick all düchtig hoegten. Hartmut hett bi dat Leed "Herzilein" drei Taugawen maken müßt, wiel de Text so schön wier un hei den Frugentext so hoch sungen hett.
Dat wier ein schöner Nahmeddag. All güngen vergnäugt na Hus. Blot de leiwe Sigi mit ehre flietigen Helpers Karin un Elfi sünd noch bläben un hemm´ uprümt. Hartlichen Dank an de Organisatoren.
Fotos: Eva Dittberner
