Bi de Oberbörgermeisterin

Christine is jeden Dingsdag nåmiddags bi ehr lütten Plattsnacker von de Hundert-wasser Gesamtschaul in Lichtenhagen. De lütten Plattsnacker sünd Leni, Richard un Tim. Sei gåhn in de föfte Klass un hemm‘ siet September väl Freu‘ dorbi von Christine Platt tau lihr‘n. Platt is wat Besünneret, dat nich jedein künnt. Dor sünd sei bannig stolz up. Verståhn künn’s all väl. Un sülben spräken lihren’s von Mål tau Mål bäder. Sei hemm‘ all secht, dat sei in’t anner Schauljohr wieder måken will´n. Bi Christine lihren’s œwer nich blots dat plattdüütsch Snacken, sünnern ok ehr Heimatstadt Rostock bäder kennen. So wier’n sei all in de Universität, an’t Zoologische Institut, up Stadtrundgang in Warnemünn un in’t Rostocker Råthus. Jå, tau Besäuk bi de Oberbörgermeisterin! Dat wier ‘ne dulle Såk de Christine organisiert har. Fru Kröger wier sihr intressiert un nehm sick Tiet för de Kinner. De wier’n so fipperig, dat sei binåh vergäten hemm‘ Platt tau snacken. Un wat de Kinner an’n mihrsten von Fru Kröger weiten wullt? Ob sei een Husdiert har un ob sei ok Computerspälen mücht. Fru Kröger hett sick amüsiert un von ehr schwatte Katt vertellt un von ehr Leidenschaft för‘t Zocken an’n Computer. Tau Enn´ geef dat noch ´nen Rundgang dörch dat Råthus, bet ünner dat Dack un achter de Råthus Klock, wo süst keinein henkümmt. Un woans geih’t wieder? Christine hett Freu‘ an de Arbeid mit de Kinner un noch väle Ideen. Sei plant all anner intressante Akschonen mit ehr lütten Plattsnacker.

In´n „Städtischen Anzeiger“ von´n 26. April 24 up de Siet 5 is ein Artikel oewer de Aktivitäten von Christine rutkamen. Sihr interessant!

Text un Fotos: Gerlinde John