Afscheedsbesäuk

Mit`n Niejohrsgruß harr sick Regine Lück, de Präsidentin von de Rostocker Börgerschaft, ganz hartlich bi unsen Verein för den Insatz tau de Pläg von uns plattdütsch Sprak bedankt. Dit wier nu wedder ´n Grund, Fru Lück üm `nen Termin tau bidden. Wi wullten giern ein poor Gedanken oewer uns Vereinsarbeit un uns Mitwirken bi`t Stadtläben loswarden. Ok för de gaude johrelange Tausamenarbeit. Dat klappte schnurstracks. So wieren Sigrid, Uwe un ick in`t Rathus. Wi harren väl tau berichten oewer dat Läben in uns Heimatstadt un uns Möglichkeiten, wurans wi de plattdütsche Sprak noch mihr dorför nutzen künnten, dat sick de Rostockerinnen un Rostocker richtig tau Hus fäuhlen können un de plattdütsche Sprak ok fäuhlen. Tau`n Bispill bi de Ansagen in de Stratenbahnen, viellicht up Banner bi de Hansesail orrer ein Mitdaun von unsen Verein bi städtische gröttere Veranstaltungen. Wi hemmen uns Gedanken verklort un Fru Lück hett uns Maut makt, dörch Utspraken mit de taukünftigen Börgerschaftsfraktionen, de Afgeordneten för disse Gedanken un Vörhaben tau oewertügen. Wi hemmen ok oewer uns Daun in Kinnergordens, Schaulen, Klönsnackrunnen in Begägnungsstätten, väle, väle Uptritte von unsen Verein bi de ollen Minschen in de Heime vertellt un mit de Präsidentin bespraken, wurans disse Börgerarbeit von de Stadt unnerstützt warden kann. Un schönen Dank nochmal för de gauden Henwiese von de Präsidentin! De Besäuk harr ok wat von „Adschüß seggen“. Regine Lück will sick nich wedder upstellen laten för de nächsten Wahlen. Dormit geiht ok ehre Amtstiet as Präsidentin tau Enn`.                                                                                                                                             

Wi hemmen ehr ganz hartlich för de johrelange gaude Tausamenarbeit dankt un all`ns Gaude, vör allem väl Gesundheit, wünscht.

Schön, dat sei an`n 8. 6. 24 bi`n Bäukerdag dorbi is, de Veranstaltung eröffnet un ok bi de Oewergaw von den Unkel-Bräsig-Pries den Priesdräger orrer de Priesdrägerin gratulieren ward.                                                                                                                                          

Wi können blot noch eis utraupen: Holl di fuchtig, Regine!    

Text: Jens Anders, Plattdütsch: Christa Winkelmann