WIR LIEBEN COOKIES
Ausfahrt zur 33. Hanse Sail ab Stadthafen Rostock
Stadthafen Rostock, Warnowufer 18057 Rostock
Dat wier mal wedder ´ne schöne Hanse Sail in Rostock. As jedet Johr sünd väle von unse Maaten un Maatinnen an Burd von de “Kasper Ohm” wäst. Up den Weg dorhen wier kum ein Dörchkamen. Minschen oewer Minschen, väle Bauden, Fohrgeschäfte un Bühnen mit Veranstaltungen un Musik. Dat geef ok an jedein Eck wat tau Äten un tau Drinken. Dat Wärer hett mitspält, dat heit, wi sünd düchdig in´t Schweiten kamen.
Ok uns Schipp is kum an de Anlegstell kamen, dor sick ein poor drieste Botsschipper grad dor festmakt hemm´ un weggahn sünd. All hemm´ dat Gewäuhl oewerstahn un sick in Geduld fat. Wi seeten denn kommodig tausamen un hemm´ uns de Schäpen bekäken. Jens Anders spälte mit sien Brauder Dieter as de “Anders-Brosers” för uns up ehre Treckfiedeln. All hemm´ sick freut un mitsungen. Ein Leed na dat annere hemm´ sei spält un de Stimmung wier grotorrig. Wi schipperten von´n Stadthaben bet Warnemünn´ un taurüch. Ünnerwägens sünd uns väle Sägelschäpen begägent un väle Fotos würden makt. Bi´t Äten, Drinken, Singen un Klönen is de Tiet fix vergahn.
Endlich wieren wi wedder in´n Rostocker Stadthaben un denn güng dat los mit dat Füerwark. Wunnerschön wier dat, de Krönung tau´n Afschlut von de 33. Hanse Sail.
Ein schöner Abend mit plattdütsche Frünn´ un ehre Angehürigen. Välen Dank an de Organisatoren, unse Musikers un an de Crew von de “Kasper Ohm”.
Text: Eva Dittberner
Fotos: Hartmut Christoph und Eva Dittberner
