Afschlußveranstaltung in Stemmhagen

Fritz-Reuter-Literaturmuseum, Markt 1 17153 Stavenhagen

Afschlußveranstaltung von de Plattdütsch-Wochen 2023

An’n 18. Juni wier´n Sigrid Malewschik un ick in Stemmhagen tau de Afschlußveranstaltung von de Plattdütschen Wochen. As wi ankäm’n, wier schon väl buntet Drieben up’n Marktplatz. Dat güng all sihr interessant los mit ´ne Führung tau de Museumklock von’n Literaturmuseum. Schon de Upstieg oewer de engen Stiegen wier ein Biläw-nis. Herr Hunter, de siet Johren disse Klock hägt un plägt, verklorte uns, wie de Technik funktschoniert un dat hei johrlang bemäuht wier, disse Klock Instand tau hollen. As wi glücklich un heil wedder ünnen ankam’n sünd, hett de Posau-nenchor von Stemmhagen ein schönet Konzert dorbröcht.
Dornah güng dat mit Reuters Spaziergang wierer. De Rundgang wier sihr informativ för uns beid, taumal `ne Plattsnackerin lütte Geschichten ut Reuters Werke, “Stromtied”, “Franzosentied” un annere, vörläst hett. Dorbi is sei ümmer vör de Hüser stahnbläben, wur Lüüd ut Reuters Werke einst wahnt hemm. As wi trüch käm’n, hett de Reuterchor sien Programm dorbröcht. De Läsung mit Wolfgang Mahnke is leider utfoll’n.
Tau´n Afschluß hemm´ wi beid noch ´nen Runngang dörch dat Literaturmuseum makt, wurbi wi ok erfohr‘n hemm´, in wecke Stuw´ Fritzing Reuter bur´n worden is.

Text:   Jürgen Wittmüß


 

Fotos: Sigrid Malewschik

Zurück