Vereinswihnachtsfieer

Unse Wihnachtsfieer wier wat Besonneret. Väle Vereins-maaten mit ehre Partner sünd kamen. Sigi hett all´s gaut mit de Verantwurtlichen von de Trotzenburg afspraken. Bi den´n Aflop hett dat jedoch ´n bäten holpert. Ierst keem kein Kaffe. As de Kauken keem, wier de Kaffe längst all. De Kauken wier  deilwies froren. Aewer unse Maatinnen un Maaten hemm´ sick dörch so´ne Kleinigkeiten nich de gaude Lun nähmen laten.

Uns Vörsitter Jürgen un siene Stellverträderin Sigrid begrüßten de Lüd hartlich un wünschten allen frohe Wihnachten. De Dische wieren schön deckt un unse leiwe Karin Tanz hett, as jedet Johr, schöne Wihnachtsgestecke mit Lichters makt, obwoll sei sülwst nicht dorbi sien künn. Dorför bedanken wi uns hartlich. Na dat Kaffedrinken geef dat ein schönet plattdütschet Programm mit Jürgen Wittmüß, Anke Moll un Hans-Jürgen Schulze. Dorna makte uns Muskant Nico Nenov up sien Keyboard Wihnachtsmusik. Dat wier all´s sihr gaut. Leider keemen annere Maaten, de sick ok up ´nen lütten Vördrag vörbereit´t hemm´, nich mihr tau Wurt.

Maike Krüger un ehre Mudder, Sigrid Krüger, sorgten as ümmer för de Wihnachtstombola. All´s wier leiwfull inpackt. Jedet Los wier ein Gewinn.  Einige Maaten künnten dat gor nich aftäuben, de Gewinne uttaupacken. Dat geef ´nen orrigen Spaß. Leiw´ Sigrid un leiwe Maike, dorför gehürt Juch ein hartlichet Dankeschön un ´nen groten Bifall.

As Eva Dittberner denn dat Dankschriewen von Fru Prof. Dr. Eggers von de Kinner-kräwtstation för unse Spenn´ vörläste un wi de Aktion ok wierermaken wull´n, oewergeef Maike spontan den Erlös von de Tombola in´n Wiert von 50,00 Euro tau dissen Zweck an den Verein. Ick glöw´, dat ward ok in Taukunft wedder  ´ne gaude Spenn´ - Aktion. Eva oewerbröchte ok noch ´nen schönen Gruß von Wolfgang Mahnke mit ´nen Riemel dortau. Dat hett uns sihr freut. Uns Präsident, Uwe Süssmilch hett sick dat ok nich nähmen laten,  ein poor Würd an de Vereinsmaaten tau richten.

Dat Abendäten mit Antenkühl, Rodkrut un Tüffelklüten keem pünktlich un hett sihr gaut smeckt. De Maaten hemm´ hulpen, dat all´s fix verdeilt un noch heit up de Dische keem. De Maaten un Partners süngen un snackten all väl miteinanner, prosteten sick tau un güngen denn vergnäugt na Hus.

Dat wier trotz de Versümnisse von de Gaststätt´, ´ne schöne Wihnachtsfieer.

Text: Eva Dittberner

Fotos: Hartmut Christoph und Eva Dittberner