Klönsnack an´n Spinnrad

Besäuk up den Netzbodden in´n Fischereihaben

Sigrid Malewschik hett uns all´s gaut verklort. Dor ward noch väl mit de Hänn´ knüppt. De Netze warden na Bestellung farigstellt.

Besäuk in de Stiernwart Rostock

De Besäuk in de Stiernwart wier sihr interessant. 18 Maaten un plattdütsche Frünn hemm sick an´n 24.02. üm Klock twei drapen un sick vun Herrn Fajkus all´s verkloren laten. Wi hemm ´ne dulle Simulation vun den´n Stiernhäwen seih´n un de Stiernteiken kennenlihrt.

In den Planeten-Gorden sünd de Sünn, Maand un Planeten in ehre Bahnen ut gräunen Bucksbom dorstellt.

Herr Fajkus wieste uns den Weg in dat Allerheiligste, nämlich in de Kuppel mit dat Fiernruhr. Dor mal dörchtaukieken in de Nacht, dat wier all wat.  - De Möglichkeit besteiht. -

Ünner dat Motto: "Klönsnack an´n Spinnrad" bisöchten wi ditmal an´n 4. un 6. April dat

Museum in de Sankt-Georg-Schaul

Väle Johre all bedrifft uns Vereinsmaat Wolfgang Wilken sien Schaulmuseum in Rostock in de Sankt Georg -Schaul. Dat wier för em nich ümmer licht. Väle Male müßte hei ümmer werrer ümtrecken un all de Dusende von Erinnerungsstücke inpacken, woanners ünnerstellen, werrer utpacken, nieg upbugen.
Nu oewer is`t woll naug un all`ns schön na den Ümbu in de Schaul inricht`t. Dat wier em nu ein Vergnäugen, uns, siene Maaten, all`ns tau verkloren un vörtauwiesen.

Stolt wieste hei up de lange Reihg von Klassenbäuker von 1892 an. Ja, Ji hefft richtig läst. De Schaul fieert in`n Oktober 125. Geburtsdag. Dat Pult, de Tafel, de Ruhrstock, de Spucknapp usw. de 1. Afschnitt bet 1914. Denn käm de grote Afschnitt vör den 2. Weltkrieg. Hei wieste uns dorup hen, dat wi mit wake Ogen de Pulletik verfolgen möten. Denn käm de 3. Afschnitt mit väl Material ut`n Ünnerricht, Frietiet un Upbu in de DDR. Einen groten Afschnitt nähmen ok de berühmten Frugens un Männer in, de mal Schäuler in de Sankt Georg -Schaul wieren.
So as Jo Jastram, W. Kempowski, Liesel Eschenburg, K. Eschenburg, Günter Hagemann usw.. Sogor Heinz Winkelmann un uns Störti, Sascha Gluth ( sien ehemaliger Schäuler ) sünd dor verewigt.
All`ns wier interessant för uns un rägte uns an, oewer unse Schaultiet un de verschiedenen Gesellschaftsordnungen nahtaudenken. Välen hartlichen Dank, Wolfgang för all Diene Mäuh.
Blief gesund un holl Di fuchtig!

Text: Christa Winkelmann
Fotos: Hermann Peters