Hett sick ein mal so dägt verletzt, dat hei bannig blött', möt hei sick oewer de Wunn kolles Wader loopen laten, dat stillt dat Blaut un treckt de Wunn tausamen.

De Hieringstied lött twors noch een bäten up sick täuben, liekers kann man sick je nu all up eenen schönen Bradhiering freuen. Dat gellt oewer ok för jeden annern Fisch. Also: De Fisch bliwwt bi't Ümdreihen in de Pann heil, wenn man in dat heite Bratfett een poor Druppen Zitronensaft sprütt.
 

Man find't  af un an Placken von de Talglichter up männig Dische orrer anner Holtmöbel. Wenn man de tau Lief gahn will, makt man dat ganz eenfach mit'n Fön, bät dat Wachs dünnflüssig ward un wischt dat denn mit een Stück weeket Popier wech. Dornah mit Essigwader nahwischen.

Ok wenn't nu all 'n bäten köller ward, de lütten Aaftfleigen sünd liekers dor. Wenn man ne Zitron dörchschnitt un de Schnittflächen mit Gewürznelken spickt, ward man se ganz fix los. De Zitron lockt de Fleigen ierst mal an, oewer von de Inhaltsstoffe von de Nelken starben de Fleigen.
 

Will man 'n lütten Nagel in de Wand kloppen un nich vörwech sienen eegen Dumen drapen, stickt man den Nagel eenfach up een Stück Papp', denn geiht de Saak ahn Verletzung un Arger af.
 

Dat Aawt is nu riep un licht kann man sick mal beklackern. Hett man 'n frischen Aawtplacken up siene Kledaasch, einfach Mineralwader roewergeiten, drei Minuten inwirken laten, un de Placken is wech.
 

De gaude Rat is passig tau de Ierdbeertied. Dor steiht denn up jeden Koffidisch ok ne Ierdbeertort. Männigmal is dat mit dat Gelee je sonne Saak. Maleis is se tau dünn, denn wedder ward dat Tüchs  tau fix stief. Süll dat passiern, lött man een Metz orrig heit warden un strickt denn noch mal oewer dat Gelee, bät de Belag glatt is.
 

Argert Ji Juch ok männigmal, wenn dat "gaude Tafelsülwer" bannig anloopen utsüht? Wi können helpen!  Leggt in een Schöddel 2 Stück Alufolie, gäwt 2 Teeläpel Solt dortau un denn dat Sülwerbesteck ok noch. Nu ward de ganze Kram mit kakendet Wader oewerga ten, un Ji hewwt wedder den Glanz för den Festdagsdisch tröchhalt.
 

Dat Fröhjohr steiht för de Dör, ok wenn't in'n Momang noch nich so utsüht. Wenn de Fröhjohrsputztied ranner is, hett jedein ümmer väl Arbeit, den Winterdreck bitaukamen. Hier nu de Hülp! Sünd de Finsterrahmen ut Kunststoff orrig schietig, möt man in dat Putzwader 3 Ätläpel Fleckensalz rinnerdaun, denn hett man wietut weniger Maleß bi de Putzerie.

De Plätzchenbacktied kümmt je bald ran: Bi't Utrullen von den Deik backt de doch oft an dat Nudelholt fast. Dat passiert nich, wenn man oewer den Kaukendeik ne Klorsichtfolie leggt un em denn utrollt.

De Mannslüüd koennen wieldeß je vör'n Fiernseiher sitten gahn. Süll dat denn so spannend warden, dat se de Zigarrenasch' up'n Töppich fallen laten un 'n Lock dorin brennt hebben, bruuk Mudders dat gornich mittokriegen. De verbrennten Fasern warden mit ne Rasierkling' kott afsnäden. Mit ne ganz harte Böst möt man up'n anner Flach poor Fasern rutbösten un de denn mit Alleskleber up dat Brandlock fastbacken. Wat hebben wi liehrt? Nix passiert!
 

Hewwt Ji Juch mal von ne Imm' orrer Wesp' stecken laten, treckt den Stachel rut un riewt de Stell mit ne rohe Zibull (Zwiebel) in.
 

Eenen dägten Fettplacken kann man gaud biekamen, wenn man dorup mit ne  rohe Tüffel up rümriwwt.
 

Spaß möt sien, dorüm: wecker 'n Hausten hett, möt Rhizinus nähmen! (Denn truugt hei sick nich miehr tau hausten.)
 

Hett sick mal ein up'n noch backsigen Kaugummi sett', leggt de Büx in'n Plastebüdel poor Stunn in't Koehlfack, denn lött sick de Kaugummi licht afpuulen.
 

Hewwt Ji wüßt, dat Suerkruut jünger makt, bi Verküllung helpt un den Magen un Darm up Vöddermann bringt, den Darm entgift't un Rheumabeschwerden linnert?
 

Orrer: man hett Pech hatt un dat Suppenfleesch is von'n ollen Ossen un will nich weik warden, denn sall man 'n lütten Schuß Essig orrer Wienbrand in't Kaakwader dauhn, denn ward dat Fleesch zort.
 

Sünd up Finsterschieben orrer Speigel noch Putzstriepen, kann man de mit ne rein' utgedeinte Strumpbüx ganz fix wegwischen.
 

Wecker weit woll, dat man orrig 'n Pott vull Häuhnerbulljon (Häuhnersupp) drinken sall, wenn man Snuppen hett?
 

Schmitt de Gummiboom Bläder af, denn sall man mit ne Rasierkling' ne lütt Karw (Kerbe) oewer de Bruchstell snieden, un nah kotte Tied entwickelt sick an de Städ een nieget Blatt.
 

Bi ollen Winterwäder kann't passiern, dat man as'n so seggt spröde Hänn,- also ruhge Huut kriggt. Dor helpt Juch dat, wenn Ji Juch öfter eis de Hänn' mit Boddermelk inriewt. Ok bi Huurnhuut sall dat helpen.
 

Wenn Fru Holle ehre Bedden orrig utschüddelt hett, sammelt man väl Snei in'n Pott un versorgt mit dat nich tau kolle Sneiwader Juch Blaumenpött. Se warden Juch dat gewiß danken, denn in dat Sneiwader sünd väle Mineralien, de de Planten bruken.
 

Plagt Juch een düchtig' Snuppen, wascht Juch dat Gesicht miehrmals an'n Dag mit koll' Wader. Wat gägen de Gripp helpen sall, hebben wi je uns kranken Vereinsmaaten all as gauden Rat mit up'n Weg gäben.

Bald mehr...